Nagapanindugan ang chairman sang Committee on Agriculture sa Iloilo Provincial Board nga indi pa ini sang husto nga tion agud nga mag-import ang Pilipinas sang kalamay.
Sa interview sang Bombo Radyo kay Iloilo Third District Board Member Matt Palabrica, iya ginpahayag nga milling season pa subong ukon tig-galaling sang tubo.
Kahapon, Pebrero 4, ginsapubliko sang Sugar Regulatory Administration (SRA) ang Sugar Order Number 3 nga maga-import ang Pilipinas sang 200,000 metric tons sang kalamay sa crop year 2021-2022.
Apisar estable ang suplay sang pungsod, ginpahayag nga katuyuan sini nga ma-stabilize ang pagsaka sa presyo sang kalamay sa Pilipinas.
Ginapahayag nag-umpisa saka ang presyo sang kalamay kag nakalab-ot sa record highs matapos nga naglaslas ang Bagyo Odette kag naigu pati ang sugar-producing regions kaangay sang Negros, Panay, kag Eastern Visayas.
Suno kay Palabrica, kun madayon na ang importation, maganubo naman sa sini ang presyo sang kalamay kag maapektuhan gid ang mga sugar planters sa rehiyon.
Sa pagkamatuod suno kay Palabrica, nabatyagan na sang sugar associations ang pagnubo sang presyo subong.
“Alarming ni sa amon nga part nga nagpanaog ang presyo sang kalamay, kay buot silingon, madayon gid ang importation. Ano ni, dulaon na lang nila ang mga mangunguma sa pungsod Pilipinas?,” suno kay Palabrica.
Nagapati man si Palabrica nga may ‘malisya’ kun ngaa nga ginduso nga patigayunon ang importation ukon may yara gid sang naga-benepisyo bangud sa transaksyon.
“May mga interesado gid nga maka-gain sa importation, kay nakita nila nga wala na sang exportation.” Nagpangayo man sang intervention si Palabrica sa gobyerno.
Suno kay Palabrica, wala pa gani nakapatunga ang gobyerno sa problema sa pagsaka sa presyo sang abono, apang gindugangan pa gid sang importation.
“Gapangayo na kita sang intervention. Wala pa gani naka-intervene sa abono, manaog naman ang presyo sang kalamay kay may importation? Mahapdi gid na katama,” suno kay Palabrica.
Una diri, gin-anunsyo man sang gobyerno nga maga-import ang Pilipinas sang bugas, meet products, kag isda subong nga tuig. ##(Photo Courtesy: Business World Online)
