Natalana nga mag-import ang Pilipinas sang 240,000 metric tons (MT) sang refined sugar sa Septyembre agud mapasigurado nga estable ang suplay kag mangin rasonable ang presyo sini sa merkado.
Base sa nakasaad sa Sugar Order No. 5 nga napetsahan Agusto 8 kag nasapubliko sang Byernes, Agusto 9, ini ang una nga sugar import program sang pungsod sa crop year 2023–2024 kag production crop year 2023–2024.
Tuyo sang programa nga maka-secure sang bastante nga domestic supply kag buffer stock kag ipabilin nga preparado ang pungsod sa ginalantaw malain nga epekto sang El Niño sa 2024-2025.
Kasunod sini, ang regulation department sang Sugar Regulatory Administration (SRA) sa Quezon City kag Bacolod ang magabaton sang import applications kag requirements sa sulod sang lima ka working days halin sang nangin epektibo ang order.
Sa pihak nga bahin, iga-isyu naman ang import allocations sa sulod sang lima ka working days kasunod sang deadline sa application.
Suno sa regulator, ang kada alokasyon sang imported refined sugar ang subject sa bond nga P250 per 50-kilogram bag — ang total amount nga pwede mabayaran paagi sa manager’s check.
Ginalauman sang SRA nga maga-abot ang imported nga kalamay sa pungsod sa Septyembre 15. Ang anuman nga imported volume sang refined sugar ang awtomatiko kabigon nga “C” ukon reserve sugar.
Una na nga ginpahayag ni Agriculture Secretary Francisco Tiu Laurel Jr., chairman sang SRA board, nga ang import program ang maga-address sa ginapanan-aw na nga kakulangan sa sugar stocks agud nga masustiner ang supply sang Pilipinas tubtub sa masunod nga milling season sa Oktubre.
As of June 9, nagadangat na ang total refined sugar stocks sang pungsod sa 492,985 MT nga 14 percent nga mas mataas sa 432,215 MT recorded inventory sa amo man nga period sang nagligad nga tuig.
