Wala sang makapugong sa Pilipinas nga malab-ot ang target sini nga mangin upper-middle income economy sa 2026.
Ini ang ginpahayag ni National Economic Development Authority (NEDA) Secretary Arsenio Balisacan bisan pa nga may mga pagpanghangkat kaangay sang trade war sa tunga sang igapatuman ni US President Donald Trump nga reciprocal tariff policy.
Kumpyansa ang socioeconomic planning chief nga magasangkad ang gross domestic product (GDP) sang Pilipinas sa 6% nga amo ang pinakamanubo sa growth target sang Marcos administration subong nga tuig.
“But we still think that 6%… is still achievable… We are crossing our fingers, there are risks out there but we’ve been watchful, vigilant. We’ve adjusted policy tools to make sure our economy maintains its resilience amid uncertainties,” suno sa tiglikom.
Sa idalom sang latest classification sang World Bank as of July 2024, nagapabilin ang Pilipinas sa lower middle income economy nga may gross national income (GNI) per capita nga $3,950 sang 2022 nga sulod sa bracket para sa sini nga status.
Kaupod sang Pilipinas sa sini nga bracket subong amo ang Vietnam ($4,010 GNI per capita); Laos ($2,360); Cambodia ($1,700); kag Myanmar ($1,210).
Yara naman sa upper-middle income level ang kaiping nga mga pungsod kaangay sang Malaysia ($11,780); Thailand ($7,230); kag Indonesia ($4,580). Mas mataas pa gid ang Singapore ($67,200) kag Brunei ($31,410) nga yara na subong sa high-income bracket.
