Mas madamo nga coronavirus disease 2019 (COVID-19) tests kada adlaw ang napatigayon sang Pilipinas sa bulan sang Hulyo ipanggid sa anom ka mga Asian nations.
Suno kay National Task Force Against COVID-19 (NTF) deputy implementer kag testing czar Vince Dizon, kun basehan ang figures nga makit-an sa England-based data kag research platform, ang Japan ang nakapatigayon lamang sang 15,115 tests sang tinalikdan nga bulan ipanggid sa Pilipinas nga may 35,000 tests.
Apang pahayag ni Dizon, indi mag untat ang pungsod sa pagpatigayon sang COVID-19 tests.
Ang iban nga Asian nations kaangay sang Indonesia ang nakapatigayon lamang sang 12,777 tests, South Korea nga may 7,957, Malaysia nga may 6,494 kag Singapore nga may 6,402 tests base sa Hulyo 27 nga data.
Dugang pa sang natungdan, ginaduso sang Department of Health nga mas pasangkaron pa ang pagpatigayon sang tests sa mga lugar nga may madamo nga kaso.
Nagalaom si Dizon nga sa subong nga Agosto, maka test pa ang pungsod sang duha ka milyon nga mga Pilipino.
