ILOILO CITY – Nagpasalig ang Department of Agriculture nga bastante sa gihapon ang suplay sang bugas sa pungsod kag nalab-ot ang daily food needs sang mga Filipino sa pagsugod sang ikatatlo nga quarter sang tuig.
Suno kay Undersecretary Leo S. Sebastian, in-charge sang Masagana Rice Industry Program sang ahensya, ang mabinungahon nga harvest sang Enero tubtob Hunyo nga rice planting season ang ginalauman nga magaresulta sa six percent increase sa produksiyon.
Base sa data nagikan sa PhilRice PRISM, ang palay production ang ginapanan-aw nga maglab-ot sa 8.605 million metric tons sa 2023 nga katumbas sa 5.6 million metric tons sang milled rice.
Suno kay Sebastian, ang ini nga volume, nga dugang sa carry-over stock nga 1.8 million metric tons sang milled rice kag dugangan pa sang pag-abot sang 1.8 million metric tons pinaagi sa imports, ang mangin bastante agud malab-ot ang demand kag consumption sang seven million metric tons humalin sang Enero tubtob Hunyo.
Dugang pa niya, ang current price fluctuations ang bangud sang mataas nga local kag global production costs nga naga-apekto sa presyo sang domestically grown palay kag imported rice.
