Gintapos na ni Melvin Jerusalem ang malawig-lawig man nga world championship drought sang Pilipinas sa pro boxing matapos ginlutos ang Japanese fighter nga si Yudai Shigeoka paagi sa split decision kag naagaw ang trono bilang World Boxing Council (WBC) minimumweight champion!
Ginpatigayon ang sambuwa sa International Conference Hall sa Nagoya, Japan kadungan sang Easter Sunday kun sa diin duha ka beses nga gintumba sang Pinoy si Shigeoka — isa sa third kag isa sa sixth round.
Apisar sang duha ka knockdowns, nangin masandukot ang 12-round bout kun sa diin pareho nga 114-112 ang gin-skor sang judges nga sanday Jae Bong Kim kag Barry Lindenman pabor sa Bukidnon pride samtang naghatag naman si Malcolm Bulner sang 114-113 pabor kay Shigeoka.
Nagsaka na sa 22-3 ang rekord ni Jerusalem nga may 12 knockouts, samtang ini naman ang labing-una nga kalutusan ni Shigeoka sa iya karera nga subong may 8-1 record kun sa diin lima ang knockouts.
Ang kadalag-an sang 28-anyos nga Pinoy boxer ang nagpabalik sa iya sa ibabaw sang minimumweight division. Ini man ang naghatag sa Pilipinas sang una kag nagaisahanon sang world title sa boksing matapos ang asud-asud nga kapaslawan sang Filipino fighters.
Antes ang hampang ni Jerusalem, daw kaangay nga sumpa sa Pinoy boxers ang sambuwa sa Japan — kaangay kanday Marlon Tapales kag Jerwin Ancajas nga pareho nga nalutos sa kamot sang mag-utod nga sanday Naoya kag Takuma Inoue sa Japan.
Sang nagligad nga tuig, matandaan nga nadag-an man ni Jerusalem ang iya labing-una nga world title (WBA minimumweight belt) sa Japan sang ginpierde sini ang Japanese champion nga si Masataka Taniguchi sa Osaka.#
