Nag-post ang Pilipinas sang ginasuspetsahan nga digital fraud rate nga 13.4 percent sang 2024, kapin sa doble sang global average nga 5.4 percent kag ikaduha nga pinakamataas sa mga ginsurbey nga mga pungsod.
Suno sa global information solutions provider nga TransUnion, nalampasan na sang Pilipinas ang global fraud rate sa ikalima nga sunod-sunod nga tuig.
Nagpanguna ang India nga may pinakamataas nga digital fraud rate nga nagalab-ot sa 19 percent, ginasundan sang Pilipinas kag Dominican Republic nga may 10.9 percent.
Gintudlo man sang datos ang makaalarma nga pagtaas sang mga insidente nga may kaangtanan sa pagpangdaya nga nagapuntirya sa mga Pilipino.
Halos tatlo sa apat ka mga Pilipino (74 percent) nga ginsurbey ang nagsiling nga sila ang na-target sang mga fraud scheme paagi sa email, online platforms, tawag sa telepono ukon text messages. Mas mataas ini sangsa 53 percent nga average sa 18 ka iban pa nga pungsod kag rehiyon.
