Pormal na nga naghingyo ang Philippine Olympic Committee (POC) agud matugutan ang Filipino boxing legend nga si Manny Pacquiao nga maka-compete sa 2024 Paris Olympics.
Suno kay POC president Abaraham “Bambol” Tolentino, may ginpadala na nga sulat sa International Olympic Committee (IOC) agud ma-proseso ang pagsulod ni Pacquiao sa amo nga hinampang paagi sa “universality rule.”
Photo: USA Today
Nahibaluan nga may siyam ka universality slots nga ginahatag — lima sa babayi kag apat sa lalaki — agud nga makasulod sa Olympics.
Ginahatag ang “universality places” sa mga atleta sang mga pungsod nga may pagpanghangkat nga gina-atubang nga makalab-ot sa Olympiada kun mag-agi sila sa normal nga qualification avenues.
Lakip sa ginrason sang Pilipinas agud makasulod si Pacquiao amo ang iya nga “star power” bilang boxing legend nga mahimo magamit agud ma-promote ang boksing sa bilog nga kalibutan.
Pabor kay Pacquiao nga maka-qualify paagi sa universality route bangud indi na ini eligible sa 19-40 anyos nga age limit nga amo ang yara sa Olympic qualifiers.
Nahibaluan nga naga-edad na ang eight-division former world champion sang 44-anyos kag maga-45 anyos na sa palaabuton nga Disyembre 2023.
Ginatugutan ang professional boxers sa Olympics lakip na halimbawa ang middleweight bronze medalist nga si Eumir Felix Marcial sa Tokyo Olympics sang 2021.#
