Nag-upod ang Pilipinas sa labing-una nga tion sa Exercise Talisman Sabre 2025 nga amo ang pinakadako nga bilateral military exercise sa tunga sang Australia kag Estados Unidos sang Amerika.
Ginapatigayon ini halin sang Hulyo 13 kag magalawig tubtub Hulyo 27 sa nagkalain-lain nga bahin sang Australia lakip na sa Rockhampton, Townsville, Brisbane kag Sydney.
Suno sa Armed Forces of the Philippines (AFP), nag-updanay sa sini nga drills ang regional allies kag partners agud nga mapaayo pa gid ang interoperability, pagpanghanda, kag kooperasyon sa pagsabat sang mga pagpanghangkat sa seguridad.
Nagdangat naman sa 32 personnel ang ginpadala sang armadong kusog sang Pilipinas nga ginabug-usan sang observers kag active participants.
“While the AFP sent only observers during the 2023 iteration, 2025 marks the first time Philippine military personnel are taking part as official participants in the exercises,” suno kay AFP Public Affairs Office chief Col. Xerxes Trinidad.
Nahibaluan nga nag-umpisa ang Talisman Sabre sang 2005 bilang biennial joint exercise sa tunga sang United States kag Australia.
Sa subong nga tuig, masobra sa 35,000 military personnel halin sa 19 ka mga pungsod ang nagpakigbahin sa sulod sang tatlo ka semana nga ginalakipan sang Canada, Fiji, France, Germany, India, Indonesia, Japan, the Netherlands, New Zealand, Norway, Papua New Guinea, the Philippines, South Korea, Singapore, Thailand, Tonga, kag ang United Kingdom.
Samtang ginapatigayon ang drills, nagpakigkita naman si Philippine Army chief Lt. Gen. Roy Galido sa iya counterparts sa Germany kag Australia kun sa diin na-istoryahan ang importansya sang sustained bilateral cooperation sa tunga sang nagasaka nga regional security challenges.#
