Ginpasalig ni President Ferdinand “Bongbong” Marcos Jr. nga nagatindog ang Pilipinas kaupod sa Israel kasunod sang makamamatay nga pagpang-atake sang Palestinian militant group nga Hamas.
Ginpahayag ini sang presidente sa ila pag-atubangay ni Israeli Ambassador Ilan Fluss nga personal nga nagpadulong sa Malacañang Palace agud diskusyunan ang pinakaulihi nga sitwasyon sa Israel.
Suno sa Presidential Communications Office, nagpabutyag sang kahangawa si Marcos para sa tatlo ka Filipinos nga wala pa gihapon nakit-an samtang nagpasalig naman si Fluss nga ginahimo sang Israel ang tanan agud nga mapasiguro man ang safety sang mga Pinoy.
Nagpasalamat man si Marcos sa Israel partikular sa Israeli Defense Forces bangud sa pagluwas sa masobra 20 ka iban pa nga Filipinos kag pagpahamtang sa ila sa mas hilway nga lugar.
Kun balikan, suno sa report sang Department of Foreign Affairs, duha na ka Filipinos ang patay sa amo nga kinagamo sa Middle East samtang may isa pa ka gin-alegar Pinoy man nga napatay nga kinahanglan pa nga ipaidalom sa maid-id nga verification suno sa Philippine Embassy in Israel.
Sa duha nga napatay, isa ang gintiro-patay sang militante nga grupo sang ginbuksan ang ila nga puluy-an samtang ang isa naman ang ginbihag pa sang Hamas antes ginpatay.
Suno sa embahada, ang casualties amo ang 33-anyos nga babayi halin sa Pangasinan nga anum ka tuig na nga naga-trabaho sa Israel samtang ang isa amo ang 42-anyos nga lalaki halin sa Pampanga.
Suno naman kay Philippine Ambassador to Israel Pedro Laylo Jr., wala pa sa gihapon ginarekomendar sa subong ang mandatory repatriation bangud ang duha nga napatay ang nabiktima sang adlaw sang Sabado nga amo ang una nga adlaw sang pagpang-atake kag subong suno sa iya, nakit-an nga nagtulutawhay na ang sitwasyon kag makahulag ang mga tawo nga malayo sa combat zones. #
