Nagapabilin ang Pilipinas sa ikaduha nga pwesto kun pagahambalan ang pinakadaku nga exporters sang pinya sa bug-os nga kalibutan.
Ini na ang ika-15 nga sunod-sunod nga tuig nga yara sa pangaduha nga posisyon ang pungsod kun sa diin ang total shipments sang 2023 ang nagtubo sang halos tres porsyento.
Sa annual market report sang United Nations’ Food and Agriculture Organization (FAO), nakasaad nga nangin mataas ang demand sa Pilipinas partikular sa high quality pineapple variety sini nga MD2 sa Asian markets ilabi na sa China sang nagligad nga tuig.
Suno sa amo nga UN unit, ang China amo ang nagapanguna nga manugbakal sang pinya sang Pilipinas kun sa diin naga-account ini sang ginabanta 43% sang total shipments sang 2023.
Nagsaka man ang pineapple exports sang Pilipinas sa South Korea kag Japan nga naga-account naman sang 30 percent kag 14 percent sang pineapple shipments.
Base sa Philippine Statistics Authority (PSA), kabug-usan nga 1.01 million MT sang pineapples kag pineapple products ang na-export sang Pilipinas sang amo nga period nga may balor nga $731.94 million.
Nagapabilin naman nga Costa Rica ang world’s largest pineapple exporter nga may total shipment volume nga 3.2 million MT sang nagligad nga tuig suno sa UN unit.#
