Nagapabilin ang Pilipinas bilang lower-middle income economy sandig sa pinakaulihi nga klasipikasyon sang World Bank.
Nakit-an sa ginplastar nga data sang lender nga naka-base sa Estados Unidos sang Amerika nga ang gross national income (GNI) per capita (ang final income sang pungsod para sa tuig nga gin-divide sa populasyon) sang Pilipinas ang mas manubo ipaanggid sa iban nga Southeast Asian countries.
Suno sa World Bank, ang GNI per capita sang Pilipinas sa 2022 ang yara lamang sa $3,950 ukon yara lamang sa P218,000 kada Filipino nga natuon sa bracket para sa lower-middle income economies nga $1,136 – $4,465 ukon P62,828.18 tubtub P246,943.52.
Kaupod sang Pilipinas sa sini nga bracket ang Vietnam ($4,010 GNI per capita); Laos ($2,360); Cambodia ($1,700); kag Myanmar ($1,210).
Mas mataas naman ukon natuon sa upper-middle income ang iban pa nga pungsod sa Southeast Asia nga Malaysia ($11,780); Thailand ($7,230); kag Indonesia ($4,580) nga halin man sang nagligad nga tuig sa lower middle income status.
Pinakamataas naman ang Singapore ($67,200) kag Brunei ($31,410) sa rehiyon nga yara sa high income bracket.
Gina-update sang World Bank ang income classification sang mga pungsod kada Hulyo 1, base sa GNI per capita sang nagligad nga calendar year. Ini nga latest classification epektibo tubtub sa Hunyo 30 sa masunod nga tuig.
Matandaan nga sa una nga State of the Nation Address (SONA) ni President Ferdinand Marcos Jr. sang Hulyo 2022, ginpromisa sini nga pasakaon sang iya administrasyon ang Pilipinas sa “upper-middle income status” sa 2024 nga may $4,256 income per capita.
Sang Mayo, matandaan nga ginpahayag man sang World Bank nga amat-amat na nga “on track” ang Pilipinas agud mangin upper middle-income country. #
