Nag-file sang diplomatic protest ang Pilipinas batuk sa China matapos makit-an ang presensya sang 220 ka mga militia vessels nga yara sa Julian Felipe Reef sa West Philippine Sea.
Ini mismo ang gin-anunsyar ni Department of Foreign Affairs Secretary Teodoro Locsin Jr. pinaagi sa iya nga twitter account.
Sang Sabado, nakabaton sang kumpirmado nga impormasyon ang National Task Force for the West Philippine Sea halin sa Philippine Coast Guard nga ginabanta 220 ka mga Chinese fishing vessels nga ginasakyan sang mga Chinese maritime militia ang nakit-an nga yara sa Julian Felipe Reef ukon Whitsun Reef sang Marso 7, 2021.
Santu sa ginpaguwa nga statement sang Task Force, sa pihak sang manami nga tyempo sang amo nga tion, wala nakit-an ang Chinese vessels nga nagapatigayon sang fishing activities kag nakabukas tanan ang ila mga suga kada gab-i.
Nagakabalaka ang National Task Force for the West Philippine Sea bangud posible nga may yara sang nagakatabo nga overfishing kag pagguba sang marine environment.
Wala pa sang nangin komento ang foreign ministry sang China tuhoy diri.
Maathag nga ang Pilipinas ang nagapanag-iya sang mga isla sa West Philippine Sea kun sa diin mismo ang Permanent Court of Arbitration sa The Hague, Netherlands ang nagpaguwa sang desisyon pabor sa pungsod.
Ang United Nations Convention on the Law of the Sea amo ang ginbasehan kun ngaa naga-eksister ang Permanent Court of Arbitration nga isa ka intergovernmental organization nga amo ang may katungdanan sa pagresolba sang away may kaangtanan sa arbitration.
