Nagpanawagan ang Pilipinas sa China nga i-withdraw ang ila China Coast Guard (CCG) vessel 5901, nga kilala man bilang “monster ship,” gikan sa kadagatan sang Pilipinas.
Ginpahayag ni National Task Force – West Philippine Sea (NTF-WPS) spokesperson Jonathan Malaya nga naalarma ang gobyerno sang Pilipinas sa presensya sang monster ship.
Suno kay Malaya, nagpaguwa na sang diplomatic protest ang Department of Foreign Affairs (DFA) batuk sa presensya sang monster ship.
Samtang, ginpahayag naman sang spokesperson sang Philippine Coast Guard (PCG) for WPS Commodore Jay Tarriela nga gin-deploy na ang duha ka pinakadaku nga sakayan-pandagat nga amo ang BRP Teresa Magbanua kag BRP Gabriela Silang agud tabugon ang monster ship gikan sa baybayon sang Zambales.
Ginpahayag man ni Tarriela nga ang monster ship ang nahamtang sa 77 miles sa nakatundan sang Capones Island. Una nga ginkumpirmar sang PCG ang presensya sang Chinese vessel malapit sa Capones Island sadtong Enero 4.
Ang BRP Teresa Magbanua nagbalik sa pagbantay sa monster ship matapos maka-eksperyensya sang “minor” nga derangement sang Lunes sang aga, suno sa PCG.
Nagapadayon naman ang tensyon samtang gina-angkon sang Beijing ang halos tanan nga West Philippine Sea, isa ka alagyan para sa masobra $3 trillion annual shipborne commerce sa barko, lakip ang mga bahin nga gina-claim sang Pilipinas, Vietnam, Indonesia, Malaysia, kag Brunei.
Sang 2016, ang isa ka international arbitration tribunal sa Hague nagdesisyon pabor sa Pilipinas sa mga pag-angkon sang China sa West Philippine Sea, nga nagasiling nga ang China ang wala sang legal nga basehan.
Wala naman gin-recognized sang China ang amo nga desisyon.
