ILOILO CITY – Duha ka semana antes magpanaog sa pwesto si Presidente Rodrigo Duterte, nalab-ot sang gobyerno ang target nga mabakunahan ang 70 million ka mga Pilipino suno sa National Task Force (NTF) Against COVID-19.
As of June 17, may yara sang kabug-usan nga 70,005,247 individuals nga fully vaccinated nga nagabug-os sang 77.8% sang target population base sa report sang National Vaccination Operations Center (NVOC).
Suno kay NTF chief implementer Carlito Galvez Jr., ini ang nagapakita gid lamang sang commitment sang administrasyon nga bakunahan ang mas madamo nga Pilipino batuk sa viral disease.
Nagdangat naman sa 153,013,072 ka doses sang COVID-19 vaccine ang natigayon nga ma-administer kag 74,813,407 individuals ang nakabaton sang at least isa ka dose as of June 17.
Una na nga ginpahayag sang gobyerno nga target sini nga mabakunahan ang 77 million individuals nga nagabug-os sang 85% sang eligible population sa katapusan sang Hunyo.
Dugang pa ni Galvez, ang mataas nga vaccination rate kag padayon nga pagsunod sa minimum health protocols ang makapugong sang isa pa ka COVID-19 surge.
Gin-report man sang NVOC nga nagdangat sa 14,704,514 individuals ang nakabaton sang first booster shots, samtang 648,555 ang nakabaton sang second booster dose.
Ang Pilipinas ang naglunsyar sang COVID-19 vaccination program sang Marso 2021.
