Maga-abante ang Pilipinas sa 2025 Women’s Futsal Asian Cup sa China apisar pa nga nalutos ini sa katapusan sini nga kasumpong sa qualifiers.
Ginpierde sang Australia ang Pilipinas, 2-1, sa hampang sa Yunusobod Sport Complex sa Tashkent, Uzbekistan, apang nag-qualify gihapon ang pungsod sa Asian Cup bangud nagtapos ini bilang best third-placed team sa tournament.
Nakaangkon ang Pilipinas sang duha ka daog, isa ka draw, kag isa ka kalutusan para makuha ang 7 points sa Group C. Ang Australia naman ang isahanon nga undefeated squad sa grupo ukon may apat ka daog sa apat man ka mga hampang.
Kun nag-draw kuntani ang resulta sang hampang, na-secure sang Pilipinas ang second seed sa Group C. Nagtupa ini sa ikatatlo nga pwesto bangud sa superior goal difference sa iban pa nga third-placed teams.
Antes gin-reshuffle ang national program sang nagligad nga tuig, wala gid nakaagi-daog ang Pilipinas, apang nakabangon ini subong isa ka tuig antes ang pag-host sang Pilipinas sang FIFA Women’s Futsal World Cup.
Una na nga ginlutos sang Filipinas ang Kuwait kag Turkmenistan kag naka-secure sang draw sa host nation nga Uzbekistan sa masandukot nga away.
Matabo ang Asian Cup sa China sa Mayo 7-18 para matumod ang magatiglawas sang Asya sa global showdown. Antes sini, bilang host, kuwalipikado na nga daan ang Pilipinas sa World Cup apang nag-intra gihapon sa Asian Cup bilang buildup para sa mas daku nga hampang.
