Ginklaro sang Pilipinas nga wala ini nagpromisa sa China nga i-withdraw sini ang Typhon missile system sang Estados Unidos sang Amerika.
Sabat ini ni National Security Council (NSC) spokesperson Jonathan Malaya matapos nagpahayag si Chinese foreign ministry spokesperson Guo Jiakun nga wala nagtuman ang Pilipinas sa commitment sini nga temporaryo lamang ang pag-estasyon sang Typhon missile sa pungsod.
Suno kay Malaya, para lamang sa depensa ang Typhon missile. Ginsulit man ni Malaya ang kondisyon nga ginbuy-an ni President Ferdinand Marcos Jr..
Ginsiling anay sang presidente nga tumanon sini ang Beijing nga ibalik sa US ang Typhon missiles kun mag-untat man ang China sa iligal nga pagpatrolya, pagpang-harass kag pagtinir sang mga barko sini sa West Philippine Sea.
“The Philippines never promised the People’s Republic of China that we would withdraw the Typhon missile system,” suno kay Malaya sa news briefing sang National Task Force for the West Philippine Sea. “We never made any commitment to PRC with this regard.”
Sa regular briefing sang Myerkules, nagsiling naman si Guo nga: “The Philippines has explained itself multiple times regarding the introduction of the Typhon system, pledging that the deployment was ‘temporary’ and that the system will be shipped out of the country after relevant military exercises… However, it has breached such commitments, claiming [it] would acquire its own midrange system and field these deterrent capabilities, and linking the South China Sea issue with the Typhon system.”
Ang Typhon ukon MRC Launcher ang una nga gindala sa Pilipinas sang April 2024. Gin-deploy ini sa Ilocos Norte kadungan sang bilateral army-to-army Salaknib exercises, apang ginsaylo sang ulihi sa wala ginsapubliko nga lokasyon.
Ang Tomahawk cruise missiles sa launchers ang sarang makaigu sa target sini sa China kag Russia kun ipalupad halin sa Pilipinas. Ang SM-6 missiles nga yara man sa Typhon ang sarang makaigu sa air kag sea targets sa distansya nga 200 km (165 miles).
