Nagpang-17 ang Pilipinas sa opisyal nga pagtakop sang 19th Asian Games sa Hangzhou, China –pinakamataas nga ranking sang pungsod halin sang nagpang-14 sang 1994 nga edisyon sa Hiroshima, Japan.
Sa 41 ka mga pungsod nga nagpasakop, nabulsa sang mga atletang Pinoy ang apat ka bulawan nga medalya, duha ka silver, kag 12 ka bronze medals.
Ini nga edisyon sang Asiad ang ginpatigayon halin sang Septyembre 23 tubtub Oktubre 8 kun sa diin 391 ka mga atleta ang ginpadala sang Pilipinas agud mag-compete sa iban nga mga pungsod.
Apat ka tuig ang nagligad, sa 18th Asian Games sa Indonesia, nagpang-19 ang Pilipinas sa 37 ka pungsod matapos nakuha ang apat ka golds, duha ka silvers, kag 15 ka bronze medals.
Ang pinakamataas nga Asiad rankings sang Pilipinas ang natabo sa sunod-sunod nga edisyon sang 1954 kag 1958 sang pareho nga nagpang-duha ang Filipino athletes.
Nagpanguna sa Pilipinas ang gold medalists nga sanday EJ Obiena sa pole vault; Meggie Ochoa kag Annie Ramirez sa jiu-jitsu; kag ang Gilas Pilipinas nga nagbulsa sang gold medal sa basketball matapos ang 61 ka tuig nga paghulat sang mga Pinoy.
Sa amo nga tournament, silver medalist man ang Pinoy boxer nga si Eumir Marcial apang nakakuha man ini sang ticket para sa 2024 Paris Olympics.
Nagpanguna sa medal tally ang host country nga China nga may 201 ka gold medals, 111 ka silver, kag 71 ka bronze.
Kaangay sa nagligad nga edisyon sang Asiad, nagpangaduha ang Japan nga may 52 golds, 67 silvers, kag 69 bronzes, samtang ang South Korea ang nagpangatlo nga may 42 golds, 59 silvers, kag 89 bronzes.#
