Pormal na nga nagpirma ang Pilipinas sa United Nations Convention against Cybercrime, isa ka global treaty nga nagatuyo nga pabaskugon ang kooperasyon sang mga pungsod sa pagbato sa mga krimen sa digital world kag pagpadasig sang cross-border sharing sang electronic evidence.
Isa man ini ka maragtason nga kasugtanan bangud ginkilala sini sa una nga tion ang non-consensual distribution sang intimate images bilang isa ka sahi sang cybercrime.
Nagtambong sa pirmahanay si Department of Information and Communications Technology (DICT) Secretary Henry Aguda nga representante sang Pilipinas sa convention nga ginpatigayon sang Oktubre 25-26 sa Ha Noi, Vietnam.
Suno sa DICT, gin-propose sang Pilipinas ang mas hugot nga proteksyon para sa mga kabataan nga naga-gamit sang internet, pati man ang dugang nga technical assistance para sa mga developing countries.
Tinutuyo sini nga mabalanse ang epektibo nga pagpatuman sang layi kag ang pagrespeto sa human rights sa digital space.
Ginpunto man sa convention ang nagkalain-lain nga aspeto sang cyber offenses, pagpakigbahin sang electronic evidence, kag ang pag-establish sang 24/7 nga international operation mechanism agud mapadasig ang pagsabat sa mga insidente sang cybercrime.
Sa mensahe naman ni Pres. Ferdinand Marcos Jr. ginhatagan igtalupangod sini ang determinasyon sang Pilipinas nga pabaskugon ang global cooperation batok sa cyber threats, samtang ginahalongan ang salig, accountability, kag human rights sa panahon sang digital transformation.
Kadungan sini, ginpahanumdom man sang DICT nga padayon sini ginapapag-on ang cyber resilience sang pungsod pinaagi sa mga programa kaangay sang Oplan Cyberdome kag Oplan Paskong Sigurado nga nakatutok sa proactive cyber defense.
