Ginakalangkagan sang Filipino tennis fans ang bag-o nga anunsyo nga posible mag-host ang Pilipinas sang Women’s Tennis Association (WTA) 125 tournament sa masunod nga tuig.
Kaangay ini sa Guadalajara 125, Jingshan Tennis Open, kag sa Suzhou WTA 125.
Isa ini ka tournament nga ginapasakupan sang mga dalagku na nga WTA players kag mga bag-uhan apang abilidaran sa tennis nga nagaplano nga mapapag-on pa ang ila karera kag makasaka sa mas mataas nga lebel sang WTA Tour.
Sa matandaan, nagdaog ang Pinay tennis star nga si Alex Eala sang iya una nga WTA 125 title sa Guadalajara sa Mexico sang nagligad nga tuig.
Sandig sa Philippine Sports Commission (PSC), target nila nga patigayunon ang aktibidad sa Enero 26 tubtub Pebrero 1, 2026.
Natabo ini nga development sang nagkit-anay sanday PSC chair Patrick Gregorio kag Navotas Mayor kag Philippine Tennis Association secretary-general John Rey Tiangco sang Septyemnre 29.
Magluwas sa sini nga potensyal nga tournament, maga-host man ang Pilipinas sang International Tennis Federation (ITF) J30 tournament sini nga tuig.
Ginaplanuhan man nga buksan liwat ang Rizal Memorial Tennis Courts kag tukuron ang Philippine Tennis Center.
Sa bahin ni Eala, balantayan 10:00 subong nga aga ang hampang sini batok kay Viktorija Golubic sang Switzerland sa quarterfinals sang Suzhou Open WTA 125.
Ini na ang ikaapat nga sunod-sunod sini nga quarterfinal appearance kasunod sang Guadalajara 125, SP Open, kag Jingshan Tennis Open.
Sa bilog nga tuig, ikaanum na niya ini nga quarterfinal match kag lakip sa pinakadaku sini nga nalab-ot amo ang sa Miami Open sang Marso kag ang Eastbourne Open sang Hunyo.
