Ginpahayag ni President kag concurrent Agriculture Secretary Ferdinand “Bongbong” Marcos Jr. nga posible nga kinahanglan gid man sang Pilipinas nga mag-import sang kalamay pag-abot sang bulan sang Oktubre, apang indi tuman ka damo kaangay sang una ginpahayag nga magalab-ot gid sa 300,000 metric tons.
Sa latest vlog post sang presidente, ginpahayag ni Marcos nga nagapakig-angot na subong ang gobyerno sa nagkalain-lain nga stakeholders agud maistoryahan ang isyu sa importasyon sang kalamay.
Suno sa presidente, posible nga maubos na ang sugar supply sa Pilipinas pag-abot sang Oktubre. Kun mag-import gid man, daku na nga volume suno kay Marcos ang 150,000 metric tons para sa bilog na nga tuig.
Ginpaathag man sang presidente nga una na niya nga ginbasura ang proposal nga mag-import sang 300,000 metric tons sang kalamay bangud nagapati siya nga bastante ang suplay sang pungsod kag masarangan pa ang demand.
Matandaan nga nag-isyu ang Sugar Regulatory Administration (SRA) sang Sugar Order 4 para sa importation sang 300,000 metric tons sang kalamay, apang suno sa Malacañang, iligal ang amo nga order kag indi aprubado sang presidente nga amo man ang chairman of the board.
Sunod nga nag-resign si Agriculture Undersecretary Leocadio Sebastian nga amo nga nag-pirma sa ginpaguwa nga Sugar Order.
Padayon gihapon ang imbestigasyon nga naga-cover sa tanan nga nag-sign sang order. Lakip sa signatories amo sanday Sugar Regulatory Administration Administrator Hermenegildo Serafica, vice chairperson sang Sugar Regulatory Board, kag board members Roland Beltran kag Aurelio Gerardo Valderrama Jr.
Samtang, subong man nga Lunes, may meeting ang duha ka komite sa Kamara agud athagon ang isyu sa importasyon.
Ini amo ang House committees on good government and public accountability, kag ang committee on agriculture and food. ##
