Temporaryo nga ginpa-untat sang Pilipinas ang pagpasulod sa pungsod sang mga manok nga gikan sa Brazil bangud nga nakitaan sang COVID-19 ang sample sang frozen chicken wings sa China.
Suno kay Department of Agriculture Sec. William Dar, ginpaguwa ang memorandum order subong, Agosto 14 nga nagamandu nga ipatuman ang importation ban bilang “precautionary measure”.
Nahibaluan nga ginpaalinton sang local government sang Shenzhen, China ang mga manugbakal nga mangin maid-id sa pagbakal sang frozen food bangud sa pagpositibo sa COVID-19 sang chicken wings nga gin-import sa Brazil.
Natukiban ang virus sang ginpa-idalom sa screening ang batch sang chicken wings sa Longgang district.
