Ginklaro sang Philippine Coast Guard (PCG) nga wala sini gin-abandona ang teritoryo sa Escoda Shoal ukon Sabina Shoal sa West Philippine Sea apisar ginpabalik na sa Palawan ang barko nga BRP Teresa Magbanua.
Suno kay Commo. Jay Tarriella, PCG spokesperson on the West Philippine Sea, natapos na sang Teresa Magbanua ang iya misyon nga amo ang pauntaton ang reclamation; protektahan ang marine environment; kag suportahan ang manugpangisda nga mga Pilipino.
Gindugang man sang Coast Guard officials nga “humanitarian” kag indi “political” ang ila desisyon nga bawion na ang barko matapos ang lima ka bulan nga pagbantay sa Escoda.
Pahayag pa ni Tarriela, indi man paborable ang tiyempo para sa ila kag kulang na gid ang ila suplay sang adlaw-adlaw nga kinahanglanon.
“This time around we have to ask Teresa Magbanua to pull out of Escoda Shoal for three important reasons: one, it’s because of the very bad weather. (Second), alam naman nating noong nakaraang Aug. 31 nagtamo ito ng mga structural damage, ito isang ang pangunahing dahilan kung bakit we bring her back sa port,” suno kay Tarriela.
“Third, they have already critical supply,” dugang sini. “Gaya ng sinabi ng commanding officer natin sa Teresa Magbanua, ang ating mga tropa ay kumakain ng lugaw ang some of them need medical care dahil they are dehydrated.”
60 ka gutom kag uhaw nga mga personnel ang sakay sang amo nga barko sang nag-abot sa Palawan kahapon, Septyembre 15.
Base sa inisyal nga impormasyon, nagmantinir na lamang ang crew sang lugaw sa sulod na sang tatlo ka semana kag antes pa man sila nakabalik sa Palawan, duha ka adlaw na sila nga wala na gid sang pagkaon.
Magluwas diri, wala naman sang tubig nga sarang mainom.
Kahapon sang nag-abot ang barko, tatlo ka crew ang naka-dextrose samtang isa naman ang may leg injury kag gindala sa ospital.
Matandaan nga ginpadala ang Teresa Magbanua sa Escoda Shoal sang Abril agud magbantay bangud ginasuspetsahan nga may reclamation activities nga ginahimo ang mga Chinese.
Ang Escoda nahamtang sa kalayuon nga 140 kilometers halin sa Palawan kag sulod pa sa exclusive economic zone sang Pilipinas.
Nangin kumplikado ang sitwasyon sang barko bangud sa pagpang-harass sang China lakip na ang natabo sang Agusto 31 nga makapila ka beses ini nga ginbungguan sang China Coast Guard vessels rason nga nakaangkon sang structural damage.
