Ginplastar sang Philippine Coast Guard (PCG) nga wala pa nagakinahanglan ang Pilipinas sang suporta sang mga kaalyado sini nga pungsod kun magpatigayon sang routine resupply mission sa BRP Sierra Madre apisar sang ginpakita sang China nga panibag-o nga pagpang-harass sa Ayungin Shoal sang Hunyo 17.
Ginpahayag ini ni Commodore Jay Tarriela, PCG spokesperson for the West Philippine Sea, kasunod sang mga panawagan nga i-invoke na ang Mutual Defense Treaty (MDT) agud nga makabulig ang Estados Unidos sang Amerika.
Ini nga mga panawagan ang kasunod sang agresibo nga pagbalabag sang China Coast Guard sa mga sakayan sang Pilipinas sang nagligad nga Lunes kun sa diin ginpangkuha ang ila dala nga mga rifles nga dal-on kuntani sa military post sa Ayungin, ginguba ang navigational screen kag mga equipment, ginpangtayaan sang sticks kag patalom ang mga Pinoy, ginbuslutan kag ginpakupos ang rubber boat, kag ginpalibutan ang mga Pinoy tubtub nga isa ka Navy personnel ang nautdan gid sang tudlo.
Una man nga ginpahayag ni Executive Secretary Lucas Bersamin nga indi armed attack ang ginhimo sang China kundi posible nga “misunderstanding or accident” lamang — bagay nga gin-ugyunan man sang PCG.
Suno kay Tarriela, indi ini dapat pagkabigon nga armado nga pagpang-atake bangud ang intensyon sang People’s Republic of China amo nga balabagan lamang ang resupply mission agud indi makalab-ot sa BRP Sierra Madre.
Ginpanas man sini ang kahangawa sang publiko nga ang amo nga insidente amo ang mangin tipping point sa gyera kag mangin rason nga gamiton ang 1951 MDT nga pirmado sang Pilipinas kag pinakadaku sini nga kaalyado nga amo ang United States.
Matandaan nga una na nga nagpahayag sang iya posisyon si President Ferdinand “Bongbong” Marcos Jr sang Abril nga i-invoke ang MDT kun may soldado nga Pinoy nga mapatay sa West Philippine Sea bangud sa pagpang-atake sang pwersa sang iban nga mga nasyon.
