Ginkumpirma sang Department of Foreign Affairs nga isa ka pilipino ang nagpositibo sa COVID-19 sa Singapore.
Paagi sa iya social media account, ginpahayag ni Department of Foreign Affairs Undersecretary Brigido Dulay nga yara na sa subong ang nasambit nga pilipino sa isolation sa National Center for Infectious Diseases sang Singapore.
Padayon nga ginamonitor sang Singapore health officials ang kondisyon sang Pilipino.
Samtang nag abiso naman ang gobyerno sang Singapore nga likawan anay ang pagpadulong sa pila ka mga syudad sa Korea kaangay sang Daegu kag Cheongdo bangud sa padayon nga pagtaas sang numero sang COVID-19 sa nasambit nga mga lugar.
Sa subong may yara na sang 89 ka kumpirmado nga kaso sang COVID-19 sa Singapore.
Samtang magapauli na sa Pilipinas buas, Martes, Pebrero 25, ang ginatos ka mga Pilipino nga sakay sang Diamond Princess Cruise ship nga ginquarantine angot sa coronavirus disease 2019.
Suno kay Department of Foreign Affairs Secretary, Teodoro Locsin Jr, iya ginpahayag nga posible ginpaidalom sa testing sang pungsod Japan ang mga Pilipino antes ini pahanugutan nga makapauli sa Pilipinas.
Pahayag pa ni Locsin, mahimo may ginpatigayun nga mga testimg sa mga Pilipino apang wala pa narelease ang mga resulta.
Ang mga nagpositibo suno kay Locsin ang ginpangdala sa hospital.
Ginpasalamatan man ni Locsin ang pamunuan sang pungsod Japan, sa ginhimo nga pag-asikaso sa mga Pilipino.
Nahibaluan nga ang Diamond Princess Cruise ship nga yara sa Yokohama Japan ang isa sa may pinakadamo nga kaso sang mga nagpositibo sa Corona virus magluwas sa pungsod China.
