Naglab-ot na sa 88 ka mga Pilipino sa Israel ang nadulaan sang pulay-an kasunod sang ginbuy-an nga missile strike sang Iran.
Base sa monitoring sang Phillippine Embassy sa Tel Aviv sa ikawalo nga adlaw sang Operation Rising Lion nga subong nagatenir ang mga na-displace nga Pilipino sa temporary accommodations lakip na ang mga lapsag sang Hunyo 10.
Nagapadayon naman nga kritikal ang kondisyon sang isa ka Pinay worker nga nag-angkon sang malala kag life-threatening injuries.
Nagpaidalom na ini sa major pulmonary surgery sa Shamir Medical Center nga isa sa pinaka-advance nga ospital sa Israel.
Sa subong, padayon nga yara sa Intensive Care Unit (ICU) ang nasamaran nga Pinay kag kinahanglan liwat nga ipaidalom sa bag-o nga surgery sa oras nga mangin stable na ang iya kondisyon.
Ang isa naman nga naka-angkon sang moderate to serious injuries ang ginpaidalom man sa surgery kag na-discharge na upod ang anom pa ka mga Pilipino nga nasamaran sa pag-igo sang missile strikes sang Iran.
Samtang, naglab-ot man sa 191 ka mga Pilipino ang inisiyal nga naghingyo sang repatriation, apang yara lang sa 26 ang nagkumpirma kag ginaproseso na subong.
Nahatagan naman sang emhada sang bulig ang yara sa 303 ka mga Pilipino kapareho nalang sang financial assistance, temporary shelter, relief packages nga naga-unod sang mga pagkaon, panapton, kag hygiene products.
Madumduman nga sang Byernes, Hunyo 20 ginpasaka na sa Alert Level 3 ang sitwasyon sa Israel mangin sa Iran kun sa diin ang mga Pilipino ang ginahangyo nga mag-boluntaryo nga magpauli sa Pilipinas.
Samtang, ginpasiguro naman ni DFA Usec Eduardo De Vega nga wala dapat sang ikahadlok ang mga himata sang mga OFWs diri sa Pilipinas bangud pagaprotektahan ini sila sang mga emhada sa Israel kag Iran.
Ginahangkat man ni De Vega ang OFWs nga magapauli ukon magpalagyo sa mga pungsod nga malapit sa Israel kag iran.
Suno sa iya, may mga mabaton sila nga bulig halin sa gobyerno kun magpauli sila sa Pilipinas.
