Madamo gid ang nagdayaw kag nalipay sa ginhimo sang isa ka piloto nga gilayon nga pagbulig sang na-alang-alangan ang isa sini ka pasahero kag nagbata samtang nga malayo pa ang paghugpa sang eroplano.
Ini amo si Jakarin Sararnrakskul nga amo ang piloto sang VietJet plane halin sa Taipei, Taiwan padulong sa Bangkok, Thailand.
Bangud sa emerhensya nga ginsugid sang cabin crew nga nagabata na ang pasahero, ginbayaan sang piloto ang cockpit kag gintugyan ang trabaho sa isa ka babayi nga co-pilot.
Wala nagpang-alang-alang ang piloto nga buligan ang babayi nga todo-pangabudlay sa iya nga labor.
Gin-ako man sang piloto nga 18-anyos na siya sa iya nga trabaho, apang ini ang una nga bes nga nakapabata ini sa nagabusong nga pasahero.
Paghugpa sang eroplano sa Bangkok, nagahulat na ang paramedics kag sang ulihi, ginkumpirma nga healthy si mommy kag si baby.
Proud ang pilot sa amo nga eksperyensya kag malipayon man ini bangud mismo ang crew ang nagpa-hayo sa bata nga “Sky” bilang pagkilala sa amo nga adlaw kun sa diin nabata ini samtang yara pa sa kahawaan.
Tumalagsahon ini nga hitabo bangud sa 2020 study nga ginbalhag sang International Society of Travel Medicine, 74 lamang ka kabataan ang nabun-ag sa commercial flights halin sang 1929 tubtub 2018, kag sa sini nga numero, tatlo gid lamang ang nakaluwas.
