Napatay ang isa ka piloto samtang yara sa tunga-tunga sang flight halin sa Seattle, Washington, USA kag pakadto kuntani sa Istanbul, Turkey.
Suno sa Turkish Airlines, nalipong ang 59-anyos nga pilot nga si Ilçehin Pehlivan samtang yara sa flight 204.
Apisar sang medical intervention, wala naumpawan ang piloto rason nga nag-desisyon ang co-pilot sini nga magpatigayon sang emergency landing, apang ginbawian gid sang kabuhi si Pehlivan antes pa man makahugpa ang eroplano.
Base sa data sang tracking site nga FlightAware, ang Airbus A350 ang nakahugpa sa John F. Kennedy International Airport sa New York City antes ang alas sais sa aga.
Hilway man sa katalagman ang tanan nga pasahero kag may ginhimo nga arrangements ang kumpaniya agud makalab-ot sila sa ila destinasyon.
Nahibaluan nga si Pehlivan ang naga-trabaho sa Turkish Airlines halin sang 2007 kag base sa health check sang Marso, wala man ini sang problema sa ikaayong lawas nga sarang makabalabag sa iya trabaho.
“As Turkish Airlines, we deeply feel the loss of our captain and extend our sincerest condolences to his bereaved family, colleagues, and all his loved ones,” kabahin sang statement sang airlines.
