Luyag klaruhon ni Senate Minority Leader Koko Pimentel kay Senate President Francis Escudero kun ngaa gin-isol sini ang presentasyon sang articles of impeachment batok kay Vice President Sara Duterte.
Natalana kuntani ini sa Hunyo 2 ukon sa Lunes na apang gin-saylo sang senate president sa Hunyo 11 bangud may unahon suno sa iya nga mga hagna nga dapat ipasar.
Ini suno kay Escudero amo man ang items nga yara sa legislative agenda sang administrasyon nga kinahanglan ipasar antes magtakop ang 19th Congress sine die sa Hunyo 14.
Apang para kay Pimentel, dapat nga mas mahatagan sang ligwa ang impeachment proceedings kag ini ang santo sa nakabutang mismo sa probisyon sa impeachment rules sa Senado.
Dugang sini, indi na dapat paglainon pa ang impeachment calendar bangud nga matabo na sa Hulyo ang full-blown trial batok sa bise-presidente.
Sanday Senator Sherwin Gatchalian, Senate President Pro Tempore Jinggoy Estrada, kag Senator Imee Marcos ang naga-ugyon naman sa desisyon sang Senate President.
Sa joint statement nanday House deputy minority leader kag ACT Teachers party-list Rep. France Castro kag ACT Teachers party-list Rep.-elect Antonio Tinio, ila ginpahayag ang kahangawa sa desisyon ni Escudero. Ginsiling nga ang kada delay sa impeachment trial ang nagapataas sang espekulasyon nga pagbasura sa articles of impeachment.
Para naman sa bise-presidente, wala sang problema sa iya kun ma-delay ini kag ginatugyan na sini sa iya mga abogado ang dalan sang trial.
Gin-ugyunan man ni Sara ang recent findings sang Social Weather Stations nga 88% sa 1,800 respondents ang nagasiling nga sabton sini ang impeachment charges kag ang mga alegasyon nga ginahaboy batok sa iya agud malimpyuhan man ang iya pangalan.
Pebrero sang gin-impeach sang Kamara ang vice president. Yara ini subong sa The Hague, Netherlands agud magbisita sa iya amay nga si former President Rodrigo Duterte nga naka-detain sa ICC facility.#
