ILOILO CITY – Nalubong na ang pinaka-ulihi nga casualty sang Dengue Hemorrhagic Fever sa syudad sang Iloilo.
Ang pito ka tuig nga si Syra Mae Generale, sang Brgy. Sto. Niño Norte, Arevalo, Iloilo City kag grade 2 pupil sang E. Yusay Elementary School ang ginlubong na kahapon nga adlaw
Sa interview sang Bombo Radyo kay Ramelyn Defensor, iloy sang biktima, iya ginpahayag nga naglawig lang sang anum ka adlaw ang gintinir ni Syra Mae humalin sang ma-diagnose nga may Dengue.
Suno kay Ramelyn, ginhilanat kag gintubu-an sang rashes si Syra Mae.
Bangud sini, iya nga ginpa-admit sa hospital si Syra Mae tubtub nga ginbawi-an sang kabuhi.
Wala naman sang ideya ang iloy kun sa diin nakuha ni Syra Mae ang nasambit nga balati-an.
Samtang, padayon naman ang pagpaninlo sa Brgy. Sto. Niño Norte agud nga matapna ang pagduging sang Dengue Hemorrhagic Fever.
Sa interview sang Bombo Radyo kay Punong Barangay Melvin Minerva sang nasambit nga lugar, iya ginpahayag nga sa tagsa ka Sabado, nagapatigayon sila sang pagpaninlo kag spraying agud nga madali nga mapatay ang lamok nga nagadala sang balati-an.
Ginpahayag ni Minerva nga nagabuligay ang mga pumuluyo sa pagpaninlo sang ila tagsa ka ugsaran bilang pagsunod man sa kampanya sang Iloilo City Government.
