Timprano nga i-shutdown ukon siraduhon ang pinakadako nga coal-fired power station sa Australia bangud indi na maka-compete sa “influx of renewables.”
Nahamtang ang 2.88 gigawatt nga planta sa Hunter region sa naaminhan sang Sydney, Australia.
Ini nga planta ang gina-operate sang Origin Energy.
Suno kay Bombo International Correspondent Denmark Suede, direkta sa Australia, tuig 2025 na siraduhon ang pinakadako nga planta — pito ka-tuig nga mas timprano sa orihinal nga plano sang shutdown.
Ini ang pagabayluhan sang large-scale battery.
Isa lang ini sa coal plants sa nasambit nga pungsod nga pwersa nga siraduhon bangud sa growth sang mas barato nga renewable energy nga naglab-ot sa masobra 30 percent sang grid generation sang nagligad nga tuig kag base sa forecast, magasaka pa sa 69% sa 2030.
