ILOILO CITY- Hello sa mga plantito kag plantita!
Indi bala nanamian gid kamo nga magtandog sang mga tanom kag simhutan ang mga ini ilabi na kon matahum ini sa imo panulukan?
Apang maapresyar mo ayhan ang isa ka hardin nga imo kadtuan nga indi mo mahikap, indi mo man masimhutan kag kon indi ka gid makapugong basi amo pa ini ang magdul-ong sa imo sa ulihi nga palahuwayan?
Sa Northumberland, England, may yara sang ginatawag nga The Alnwick Garden.
Kag ini ginbansagan nga pinakamakamamatay nga hardin.
May yara na gani sang mga nagbisita diri nga nagkalalipong.
Ang rason amo nga ang makit-an sa hardin ang kapin 100 ‘toxic, intoxicating, kag narcotic’ plants.
Ginalakipan ini sang monkshood nga bulak nga wala lamang nagapamunga sang makamamatay nga berries kundi mangin ang dahon kag puno sini ang makapatay sa tawo.
Yara man ang giant hogweed nga phototoxic, nga mahimo magsunog sa imo panit kag magresulta sang pagtubo sang bitog-bitog nga magatinir sa imo panit sang pito ka tuig.
Sa subong, ang mga luyag magkadto sa hardin nga napalibutan sang salsalon nga gate kag kudal ang kinahanglan nga magsuksok sang safety suits kag kinahanglan nga magsunod gid sa tour guide agud indi mabutang sa peligro ang ila kabuhi.
