Nang-agaw gid sang atensyon ang duha ka world record holders sang sila ang nag-updanay liwat sa pagkaon, nag-photoshoot, kag natalana man nga mag-updanay sa isa ka top secret project!
Ang iconic duo nga ini amo sanday Sultan Kosen sang Turkey kag Jyoti Amge sang India — ang ginakabig nga pinakamataas nga nagakabuhi nga lalaki kag ang pinakaputot nga nagakabuhi nga babayi sa bilog nga kalibutan!
Ang 41-anyos nga si Kosen ang nagataas sang 8 ka tapak kag duha ka pulgada, samtang si Amge, 30, ang nagataas lamang sang 2 ka tapak kag pito ka pulgada.
Husto! Daw kaangay nga mataas-taas lang si Ms. Amge sa sapatos ni Mr. Kosen!
Nakahibalo ka pa gid bala?
Si Kosen amo man ang naga-uyat sang rekord sang nagakabuhi nga lalaki nga may pinamalaba nga kamot. Nagatakos ini sang 28.5 sentimetros (11.22 ka pulgada), gani ma-imagine mo kun daw ano siya ka-higante tulukon!
Indi pa maathag kun ano ang proyekto sang duha apang ginpahayag nga didto sila sa Los Angeles, California, USA ginpakadto kasunod sang imbitasyon sang wala pa ginhingadlan nga American producer.
Sang 2018 sang una nga nagkit-anay ang duha sa Egypt, nagkuha sang picture sa Great Sphinx of Giza nga isa man ka Guinness World Record holder bilang largest monolithic sculpture sa bilog nga kalibutan.
Nakuha ni Kosen ang record bilang world’s tallest man living sang 2009 bilang resulta sang iya nga medical condition nga ginatawag nga pituitary gigantism nga rason sang madasig nga pagtubo sang iya tul-an kag iban nga parte sang lawas sang mas madasig ipaanggid sa iban nga tawo.
Sa pihak nga bahin, 2011 naman sang nauyatan ni Amge ang rekord sang world’s shortest woman. Resulta ini sang isa ka sahi sang dwarfism nga ginatawag nga achondroplasia.
Sang 2014, nangin shortest actress man ini sa kalibutan matapos sini gindala ang papel ni Ma Petite sa American Horror Story.#
(Photo is grabbed from Daily Mail)
