Dapat bantayan ang mga pagbag-o nga ipatuman sa Dinagyang Festival 2020-360 degrees.
Sa interview sang Bombo Radyo kay Mr. Elvert Bañares, chairman sang Committee on Judges kag Committee on Souvenir, kag member sang Artistic Committee sang Dinagyang 2020, iya ginpahayag nga ila igabalik ang daan nga Dinagyang nga selebrasyon sang komunidad kag sang pumuluyo.
Suno kay Bañares, ang arena presentation nga ipatuman subong nga Dinagyang sa performance sang mga tribu ang magahatag sang 360 degrees ukon kabilugan nga view sang mga tribu.
Ginpahayag ni Bañares nga mangin kaangay ini sang street festival sa diin makit-an sang tumalan-aw ang performance sa tanan nga anggulo.
Dumilian man ang dalagko nga mga panel apang mahimo naman maggamit sang risers apang kinahanglan nga indi ini magtabon sa audience.
Iga-introduce man ang award para sa best Production Designer nga labing -una nga ihatag sa maragtas sang Dinagyang agud kilalahon ang abilidad sang mga tawo sa likod sang matahum nga mga production designs sang tribu.
Sa bahin naman sang Dagyang sa Calle Real nga amo ang nagbulos sa Kasadyahan Festival nga ginsaylo na sa Iloilo Charter day Celebration kada Agusto, may award nga Darling of the Crowd sa tribu nga makabaton sang pinakamatunog nga palakpak gikan sa tumalan-aw.
