Ginmandu sang Malacañang nga hilwayon na sa presuhan ang ginakabig pinakatigulang nga political prisoner sa pungsod.
Ini amo si Gerardo dela Peña, 85, nga nakaguwa sa New Bilibid Prison sang Domingo sang gab-i, Hunyo 30, kag ginsugat sang iya anak agud mapapauli na sa ila balay sa Camarines Sur.
Suno kay Bureau of Corrections (BuCor) director general Gregorio Catapang Jr., magluwas sa pag-buhin sang Malacañang sa sentensya ni Dela Peña, nakabulig man ang good conduct time allowance para sa iya nga release.
Sa order nga pirmado ni Executive Secretary Lucas Bersamin, napanubo ang sentensya sang tigulang nga preso sa 12 ka tuig. Kun idugang ang iya GCTA credits nga 11 months kag 15 days, lapaw na ini sa 12 ka tuig.
Ginkalipay naman sang political prisoners’ support group nga Kapatid ang pagpaguwa kay Dela Peña ukon ila ginatawag nga “Tatay Gerry.”
“We are very happy that Tatay Gerry can finally return home to his family and reunite with his wife Pilar in their twilight years. His release is a milestone for human rights campaigns, but also serves as a stark reminder of the obstacles that impede the release of political prisoners. Tatay Gerry’s journey to freedom was very difficult because of systemic challenges and bureaucratic delays,” suno sa grupo.
Si Dela Peña amo anay ang nagapamuno sa Camarines Norte chapter sang Samahan ng Ex-Detainees Laban sa Detensyon at Aresto (SELDA), isa ka survivors’ group sang mga na-detain sang panahon sang Martial Law nga ginpatuman anay ni late President Ferdinand Marcos, Sr. nga amay ni President Bongbong Marcos.
Na-aresto si Dela Peñang sang Marso 21, 2013 kag na-convict sa kaso nga murder sang siya naga-edad sang 75-anyos.
Una na nga ginpahayag sang Kapatid nga napamatbatan nga guilty si Dela Peña sa amo nga kaso apisar sang mga ebidensya nga nagasaad nga inosente siya kag gin-ako man sang New People’s Army (NPA) ang amo nga krimen.
