ILOILO CITY – Patigayunon sa Guimaras ang labing una nga dragon fruit festival sa Western Visayas.
Ang probinsya sang Guimaras ang nag-organize sang pinakauna nga dragon fruit festival nga patigayunon sa Provincial Capitol Grounds sa San Miguel, Jordan sa September 29 tubtob 30, 2022 kaupod ang Agri-Tourism, Farmers, Owners, Operators Association.
Ini ang kadungan sang pagsaulog sang National Tourism Month.
Sa interview sang Bombo Radyo kay Guimaras Governor JC Rahman Nava, iya ginpahayag nga ang katuyuan sang sini nga duha ka adlaw nga festival amo nga mapakita nga ang dragon fruit ang isa naman ka growing crop sa probinsya.
Dugang pa niya, ginalauman nila nga makita ang potential sang produkto nga ibaligya indi lamang diri sa Pilipinas kundi mangin sa gwa sang pungsod.
Ini ang ginalauman man nga magabulig agud nga magabatak ang nalupog nga ekonomiya sang probinsya bangud sa halit sang pandemya.
Lakip sa mga aktibidad amo ang Bike Caravan nga amo ang magaserbe bilang opening salvo.
Ang Trade Fair ang maga-showcase sang produkto sang dragon fruit kag mga cuisine nga mahimo gamit ini kag mangin ang mga dragon-fruit based products sa ginatawag nga Dragon Fruit Kitchen nga maga-feature sang Kulinarya chef nagikan sa Department of Tourism.
Ang “Dragon Fruit classroom” ang magahatag sa bisita sa Trade Fair sang impormasyon may kaangtanan sa dragon fruit value chain.
May yara man sang job fair nga patigayunon sa una nga adlaw sang festival.
