ILOILO CITY – Nangin madinalag-on ang ginpatigayon nga transport summit sang syudad sang Iloilo sa diin ang venue amo ang University of the Philippines in the Visayas-Iloilo City Campus.
Sa interview sang Bombo Radyo kay Iloilo City Councilor Atty. Sedfrey Lopez Cabaluna, chairman sang Committee on Transportation sa Iloilo City Council, iya ginpahayag nga masobra 100 ang nagtambong sa nasambit nga summit.
Magluwas sa summit, may ginpatigayon man nga workshop nga ginpangunahan sang University of the Philippines.
Suno kay Cabaluna, ginplastar sang technical working group ang halos kumpleto na kag na-amyendaran na nga modified Local Public Transport Route Plan (LPTRP) sang syudad.
Ang resulta sang mga konsultasyon ang gin-consolidate kag amo ang ginbasehan sa pag-amyendar sang naga-eksister na nga LPTRP.
Magahimo naman ang technical working group sang na-finalize na nga LPTRP kag ipasa sa Department of Transportation (DOTr) para sa ila approval.
Kabahin sang mga nagtambong sa summit amo ang nanari-sari nga sektor kaangay sang mga lokal nga opisyal sang syudad, Land Transportation Office (LTO), Land Transportation Franchising and Regulatory Board (LTFRB), kag DOTr-Central Office.
Nagtambong man ang technical working group sang probinsya kag mangin ang myembro sang Sangguniang Panlalawigan sa diin ginplastar sang mga ini sang pila ka provision sang ila ginadihon nga LPTRP ilabi na ang mga ruta nga konektado sa syudad.
