Gin-updan sang madamo nga mga Ilonggo ang ginpatigayon nga maragtason nga traslacion ukon ang solemne nga prusisyon sang imahe ni Señor Santo Niño pakadto sa iya nga iloy nga si Birhen Maria.
Nag-umpisa ang kahiwatan pinaagi sa misa sa San Jose Parish Placer Church las 5:30 kahapon sang hapon kag ginsundan sang pagdala sang imahe ni Señor Santo Niño paagi sa procession pakadto sa Our Lady of Fatima Church sa Lapuz District, Iloilo City.
Magapabilin sa Our Lady of Fatima Church ang imahe ni Señor Santo Niño kaupod ang iya iloy nga si Blessed Virgin Mary tubtub nga mag-umpisa ang naka-schedule nga fluvial parade bwas sa hapon(Enero 24).
Ala-una bwas sa hapon , dal-on na ang imahe nanday Señor Santo Niño kag ni Birhen Maria sa Philippine Ports Authority (PPA) Bacolod Wharf kun sa diin magasugod ang tradisyonal nga fluvial parade.
Kasunod sang parada, may foot procession nga magadul-ong sang imahe sa Iloilo Freedom Grandstand nga isa sa main venues sang Dinagyang.
Suno kay Fr. Nelson G. Zerda, OSA, parish priest sang San Jose Parish Church, ang traslacion nagatuyo nga mapasangkad pa gid ang spiritual dimension sang Dinagyang.
Sa Enero 25 naman, magapadayon ang selebrasyon paagi sa duha ka oras nga sadsad ukon merrymaking sa atubang sang San Jose Parish Church alas syete sa gab-i.
Pagasundan ini sang pontifical Mass 6:00 sa aga sa Enero 26 antes ang Dagyang tribes competition.
