ILOILO CITY – Magasabak na karon sa kaagahon sa Six Chair Challenge sang X Factor UK ang Pinay sidewalk vendor nga si Alisah Bonaobra.
Diri magapili sang anom ka mga contestants ang kada judges nga amo ang magasulod sa madason nga round sang nasambit nga reality singing competition.
Isa sa mga ginabantayan si Bonaobra nga tumandok sang Paco, Manila bangud sa kontrobersiyal nga natabo sang Bootcamp stage kun sa diin nagbandera sa headlines ang Pinay singer.
Nahibaluan nga taktak na kuntani sa kompetisyon si Alisah matapos makabaton sang “No” gikan sa mga judges sang ginkanta sini ang “We Belong Together” ni Mariah Carey sa una nga round sang Bootcamp.
Apang nagpakatig-a nga maghalin sa stage si Alisah kag nagahilibion nga nagpakitluoy sa mga judges kadungan sang pagbirit sang acapella sa “We Belong Together” rason nga nagbag-o ang isip sang mga judges.
Paathag ni Alisah sa interview sang Bombo Radyo, indi pa siya handa nga mag-exit sa X Factor UK.
Iya lang ginpakigbato suno kay Alisah ang iya handum kag indi gusto uyangan ang oportunidad kun sa diin nag-amot-amot ang mga Pinoy sa London agud mabaklan sila sang plane ticket nga mag-iloy para maka-audition siya sa X Factor UK.
Suno kay Bonaobra, ginkakibot sang mga judges, audience kag mangin sang kaangay sini nga mga contestant ang iya ginhimo, apang ang sa pinsar lang niya sadto amo nga magpabilin siya sa kompetisyon.
Ini ang una nga kahigayunan nga nagkambyo ang mga judges sa ila desisyon para sa isa ka contestant, rason sang mga huring-huring nga posible scripted ini agud maka-engganyo sang madamo nga viewers ang show.
Apang gin-athag ni Alisah nga indi scripted ang paghibi sini kag pagpakitluoy.
Ginpahayag sang Pinay singer nga may determinasyon lamang siya nga magdaog sa kompetisyon.
Suno kay Bonaobra, iya ini ginhimo para sa iya pamilya kag sa mga tawo nga nagapati sa iya.