Apisar sang ginsuprer nga injury kag penalty, nag-qualify ang Pinay fencer nga si Samantha Catantan sa Paris Olympics.
Nagpangibabaw siya sa women’s foil category sa Asia-Oceania Zonal Olympic Qualifier sa Fujairah, United Arab Emirates matapos nga ginlutos si Sofiya Aktayeva sang Kazakhstan, 15-14, sa final round.
Siya man ang labing-una nga fencer sa Pilipinas nga maga-compete sa Olympiada matapos ang masobra tatlo ka dekada halin sang nagpasakop man anay si Walter Torres sa 1992 Barcelona Games.
Sa third and final round, nakaangkon pa ang Pinay sang one-point penalty bangud sang red card halin sa referee.
Apang nagbawi ang 22-anyos nga fencer kag nag-skor sang apat sa masunod nga lima ka puntos agud mapatas ang skor sa 13-13.
Indi nangin mahapos ang masunod nga natabo bangud sa injury sa wala nga tuhod ni Catantan nga amo man anay ang iya nga na-injure sa gold-medal match sa Southeast Asian Games sa Phnom Penh, Cambodia.
Sa SEA Games, nag-surrender si Catantan rason nga nagbulsa lamang sang silver, apang subong, tuman ang determinasyon sini nga makatapak sa Olympiada gani may ginhingyo lamang nga lima ka minutos nga injury timeout antes ginpadayon.
Matapos ang duha ka traded points sa 14-14 tie, nakuha ni Catantan ang final point nga amo ang nakahatag sa iya sang ticket sa Paris.
Wala man sini napunggan nga magluhod kag maghilibion samtang ginatabunan ang iya nawong kasunod sang kadalag-an.
Nahibaluan nga 13 ka iban pa nga fencers nga naga-compete para sa isahanon nga Olympic spot ang ginlutos ni Catantan sa women’s foil.
Paga-updan ni Catantan sa Paris Games ang 11 ka iban pa nga Pinoy nga una na nag-qualify para sa amo nga hinampang.
