Luwas na sa katalagman ang Filipina domestic helper nga si Rhodora Alcaraz Tuñacao kasunod sang iya pagluwas sa isa ka lapsag samtang nagapadayon ang sunog sa high-rise apartment complex sa Tai Po, Hong Kong.
Ginkumpirma ini ni Consul General Romulo Victor Israel Jr. pila ka adlaw matapos gindala si Tuñacao sa intensive care unit bangud sa mga samad nga iya naangkon.
“We were able to speak to her (on Sunday, Nov. 30). The last time I visited her on Saturday (Nov. 29), she was still intubated, could not speak and was sedated,” suno kay Israel. “But she felt our presence, opened her eyes and gave us the thumbs up.”
Base sa nauna nga post sang Overseas Workers Welfare Administration (OWWA), sang nagluntad ang insidente, wala nagpalagyo ang 28-anyos nga Pinay nga tumandok sang Laguna. Sa baylo nga unahon ang iya kaugalingon, ginkup-an sini ang bata agud maproteksyunan sa kalayo kag aso sa sulod sang pila ka oras antes sila nakit-an sang rescuers.
Nakaluwas si Tuñacao, ang bata, kag ang tigulang nga iloy sang iya employer, apang nangin kritikal ang kondisyon sang Pinay.
“(On Sunday), the tube was gone and she was able to speak a little. She recounted to us everything that happened in the building. She is now stable and the prognosis is good. Her vital signs are stable,” suno sa consul general.
“Hopefully, in a few days, her condition gets better so she can be discharged from the hospital. She’s very interested to know what happened to the baby – she’s been asking all the doctors about the infant. That’s probably just showing how caring Filipinos are,” pahayag pa ni Israel.
Pahayag sang OWWA, ihatag sang gobyerno sang Pilipinas ang nagakaigu nga assistance samtang ginabulong si Tuñacao.
Nahibaluan nga sa amo nga sunog sa Wang Fuk Court, nagsaka na sa 151 ang mga napatay lakip na ang siyam ka Indonesian domestic workers kag isa ka Filipino.#
