ILOILO CITY – Nakapiyansa ang Ilongga nga tag-iya sang bogus nga Peya Travel nga nagpanontonto sa masobra 600 ka mga overseas Filipino workers (OFW) sa Hong Kong paagi sa peke nga plane ticket.
Sa report ni Bombo international correspondent Merly Bunda, matapos gindakop sang mga otoridad sa Hong Kong ang managing director sang Peya Travel nga si Rhea Donna Boyce nga tumandok sang Tigbauan, Iloilo kag graduate sang BS Mass Communications sa West Visayas State University, gilayon ini nga nagpiyansa.
Sa subong suno kay Bunda, apisar nakapiyansa, ginmanduan sang korte sa Hong Kong si Boyce nga mag-report sa mga pulis sa Enero sa madason nga tuig.
Samtang, gin-aresto naman sang mga otoridad sa isa ka hotel sa Hong Kong ang bana ni Boyce nga si Peter Boyce, 59-anyos, isa ka Australian national.
Ini ang natalana nga kuhaan sang pahayag sang mga otoridad kun paano ini nag-umpisa sang ila bogus nga negosyo kag kun paano sang mga ini natontohan ang ginatos nga mga OFW.