Dako nga pasensya kag pagtinguha ang nagdala sa isa ka Pinay Parlorista sa iya handom nga mangin nurse kag subong supervisor na sa Spain.
Sa interview sang Bombo Radyo kay Maria Edzel Lamparero-Lopez, isa ka Overseas Filipino Worker direkta sa Madrid sa Espanya, iya ginpahayag nga indi nangin mahapos ang iya gintaris nga dalanon agud makapadulong sa iya ginatindugan subong.
Graduate na sa kurso nga nurse si Lopez sang nag-apas siya sang 2004 sa pungsod Spain sa iya mga ginikanan nga nagatrabaho bilang domestic helper.
Suno kay Lopez, wala siya gilayon nangin isa ka nurse sa nasambit nga pungsod bangud required nga tun-an ang lenggwahe kag pasaron ang isa ka-tuig nga nursing course agud makakuha sang new recognized diploma.
Apang sa baylo nga magparalisa ini sa iya, gingamit ni Lopez ang mga libre nga tinion sa pagtrabaho sa isa ka Parlor kun sa diin niya nabubo ang iya abilidad sa paggunting sang buhok sa ulo kag pagpang-make-up samtang nagadalagan gihapon sa paglab-ot sang iya handom nga mangin isa ka nurse.
2013 na sang nalab-ot niya ang iya handom, kag sang nagligad nga tuig, na-promote siya bilang nursing supervisor bangud sa iya masangkad nga performance sa trabaho.
Sang naglupok naman ang pandemya kag ginakulang sang madamo nga nurse ang ospital nga ginatrabahuan ni Lopez, indi magnubo sa 20 ang iya ginbuligan nga mapasulod sa trabaho nga kaangay niya sadto, nagahandom man nga mangin isa ka registered nurse.
Ginpamatud-an ni Lopez nga sa paglab-ot sang handom, indi ang kadasigon ang talaksan, kundi ang batasan kag pagkatawo sang isa ka indibidwal samtang nagadalagan padulong sa iya kadalag-an.
