Patay ang isa ka tigulang nga Pinay matapos ini gintiklod sang isa ka lalaki samtang nagapalapit ang tren sa San Francisco, California sa Estados Unidos sang Amerika.
Ang biktima amo si Corazon Dandan, 74, kag naga-trabaho bilang isa ka telephone operator sa Parc 55 Hotel sa Union Square.
Ginapahayag nga natapos na ang iya shift kag manugpauli na kuntani ini sa Daly City sang natabo ang insidente sang nagligad nga Lunes sang gab-i, Hulyo 1.
Samtang ginahulat sini ang train sa Powell street BART Station, didto na kag ginhimo sang suspek ang krimen.
Ginkilala ang suspek nga si Trevor Belmont, 49, kilala man bilang si Hoak Taing, ang ginlaragway nga isa ka transient.
Sa press release sang train station, ginsiling nga ginatumod na sang kapulisan kun ano gid ang motibo sa krimen.
Si Dandan ang nag-migrate sa San Francisco sang 1980s, wala sang kaugalingon nga kabataan, apang nagabulig ini sa pagpa-eskwela sang iya nga mga hinablos.
Ginkondenar naman sang Filipino community sa San Francisco, California, ang krimen kag nagpanawagan nga huston man ang seguridad sa mga pampubliko nga lugar.
