ILOILO CITY – Indi makapati ang isa ka Pinay nga nakasulod sa X Factor UK, nga mangin highlight sang reality singing competition ang iya audition.
Ini matapos nangin headlines sa Gran Britanya ang pagsaot sang X Factor judges nga sanday Nicole Scherzinger nga isa man ka Pinay, kag Alesha Dixon bilang mga Bond girls, samtang ginakanta ni Jeannahlyn “Gaga” Lord ang “Diamonds Are Forever” ni Shirley Bassey.
Nahibaluan nga ang “Diamonds Are Forever” ang ika-pito nga James Bond Movie kun sa diin bida ang aktor nga si Sean Connery sadtong 1971.
Sa exclusive interview sang Bombo Radyo Iloilo, ginpahayag ni Lord nga tumandok sang Calamba, Misamis Occidental apang sa karon nagapuyo na sa Teesside, Middlesborough sa UK, lahog-lahog lang ang iya pag-audition.
Ang tinutuyo lang kuntani sini sa pag-audition, amu nga makita ang gina-idolo nga mga judges nga ginalakipan ni Simon Cowell.
Wala nagahandum ang Pinay nga magdaog bangud ang makita lang ang idolo nga mga judges, ang bastante na para sa iya.
Nahibaluan nga mismo si Cowell ang naghingyo kanday Scherzinger kag Dixon nga mangin back-up dancers sang Pinay singer.