ILOILO CITY – Indi makapati ang 22-year old nga sidewalk vendor sa Paco, Manila nga makasulod ini sa X Factor UK.
Sa exclusive interview sang Bombo Radyo Iloilo, ginpahayag ni Alisah Bonaobra nga indi mahapos ang pagpasakop sini sa X Factor UK sa diin nagpangayo pa sang bulig ang iya iloy sa mga kilala Nila sa United Kingdom agud mag-sponsor sang ila ticket.
175 ka mga Pinoy nurses sa UK ang nag-amot agud ibakal sang plane ticket nanday Alisah kag sang iloy sini nga si Luzviminda.
Nalipay man ini sang gindayaw sang isa sa mga hurado nga si Simon Cowell ang mga singers halin sa Pilipinas sang nagpakilala na si Alisah nga isa ini ka Pinay.
Ginkanta ni Alisah ang “Listen” ni Beyonce sa diin nakakuha ini sang apat ka “Yes” gikan sa mga judges.
Malipayon ini matapos nag-trending sa social media ang iya audition video sa X Factor, sa diin ginakabig niya ini nga pinasahi nga kahigayunan para sa isa ka aspiring singer.
Nangin dako nga bulig suno kay Alisah ang pagpasakop na sini sa mga singing contest sa Pilipinas kaangay sang The Voice Philippines kag Tawag ng Tanghalan agud mahanas ini sa pagkanta.
Wala naman ini makatapos sa iya pagtuon sa kolehiyo bangud nawili ini sa pagpasakop sa mga singing competition kag sa subong nagabantay ini sang iya agot nga manghod kag nagabulig man sa iloy sa pagbaligya sang pagkaon.
Ginpabugal sini sa X Factor ang iya hinuptanan nga 18 ka mga kuring kag lima ka mga ido.
Nagpanawagan si Alisah sang suporta sa mga Pinoy ilabi na sa iya mga fans.
Game man ini nga naghambal sang extro sang Bombo Radyo Philippines nga “Basta Radyo… Bombo!”
Nahibaluan nga magluwas kay Alisah, una na nakasulod sa audition sang X Factor UK sanday Elysa V, Jeannalyn “Gaga” Lord kag all male singing group nga JBK.