Hilway na sa katalagman ang Pinay sa Taiwan nga nasamaran matapos ini nag-selfie bisan nga manug-abot na ang tren.
Suno kay Manila Economic and Cultural Office (MECO) chairperson Cheloy Garafil, nangin madinalag-on ang spine injury operation sa Filipina tourist apang nagakinahanglan pa ini sang duha ka semana nga rehabilitation antes ini makapungko liwat.
Kun matapos na ang treatment, amo pa lang kag ginalantaw nga makapauli ini sa Pilipinas.
Base sa CCTV footage sa aksidente, nagatindog ang Pinay nga tuman ka lapit sa train tracks sa Shifen Sky Lantern Old Street kag ginapahayag nga naga-selfie samtang gina-alsa sini ang wala nga butkon.
Bangud nag-abot ang tren, naigu ini kag natumba. Nayudyod pa ini sang pila ka tapak kag nakaangkon sang injuries sa iya nga ulo, dughan, kag sa pelvis nga nagkinahanglan gid sang operasyon.
Magluwas diri, ginpahayag sang Taiwan Railway Police Bureau nga mahimo pa multahan ang biktima sang tubtub sa TWD50,000 ukon malapit sa P100,000 bangud sa trespassing sa train railing santo sa nakasaad sa Taiwan Railway Act.
Suno sa Philippine government official, maga-apelar sila nga ipaiway na lamang ang multa bangud malala na nga daan ang injuries nga naangkon sang Pinay. Nagpasalig man ang MECO nga mag-assist sila kun padayunon gid ang kaso sa iya violation sa safety protocol.
Nagalaum man si Garafil nga ini nga insidente ang indi makaapekto sa visa-free status sang Taiwan para sa Filipino tourists bangud isa lamang ini ka isolated occurrence. Nagpanawagan man ini sa iban nga Pinoy tourists nga magsunod man sa tanan nga mga regulasyon sang pungsod nga ila ginakadtuan.
