Napaslawan ang pinay weightlifter nga si Elreen Ann Ando nga makakuha sang medalya sa nagapadayon nga Tokyo 2020 Olympics.
Ika-pito sa pwesto si Ando sa Women’s 64kg Group A sa diin nakatipon siya sang total score nga 222.
Suno kay Bombo Samurai International Correspondent Josel Palma, direkta sa Japan, sa snatch event, na-alsa ni Ando ang 96kg sa iya first attempt apang napaslawan ang Cebuana weightlifter sa iya 99kg sa second attempt.
Sa clean and jerk, gintapos sang atleta ang iya 122kg lift sa third attempt.
Ang gold medal ang nakuha sang tiglawas sang Canada nga si Maude Charron matapos narekord ang total lift nga 236 kg.
Samtang nakuha naman ni Giorgua Bordignon sang Italya nga may total lift record nga 232 kg ang silver medal kag ang bronze medal naman ang nakuha sang Chinese-Taipei nga si Chen Wen-Huei nga may 230kg nga lift record.
Sa pihak sini, nakasulod na sa semifinals ang Pinay swimmer nga si Remedy Rule sa women’s 200m butterfly matapos nakuha ang ika-15 nga pwesto.
Gintapos ni Rule ang hampang sa 59.68 seconds.
Apang napaslawan naman ang Pinoy swimmer nga si Luke Gebbie nga maka-abante sa semifinals sang men’s 100 freestyle.
