ILOILO CITY- May posibilidad nga matabo ang realignment kag pag-updanay sang mga kandidato sa national positions samtang nagapadayon ang campaign period.
Sa interview sang Bombo Radyo kay Professor Ramon Casiple, isa ka political analyst, iya ginpahayag nga normal lang nga sa dalagan sang kampanya, may mga kandidato gikan sa lain-lain nga partido ang posible magtingob- pwersa.
Suno kay Casiple, isa ka ehemplo amo ang ginabati-bati nga possible scenario nga mahimo ilagbong sang UniTeam si Presidential Aspirant Ferdinand BongBong Marcos Jr. bangud sa iya disqualification cases kag ang magapares kay Mayor Sara Duterte Carpio amo si Sen. Ping Lacson nga standard bearer sang Partido Reporma.
Pahayag ni Casiple, sa subong indi pa mapaktan ang masunod nga magakalahinabo ilabi pa nga indi normal ang sistema sang pagpangampanya bangud sa pandemya.
Suno kay Casiple, diri nagasulod ang importante nga papel sang media agud mapalab-ot sa mga botante ang plataporma sang mga kandidato gani nangin dako nga bagay ang pagpasakop sang mga kandidato sa interviews kaangay sang Panata sa Bayan: the KBP Presidential Candidates Forum.
Dugang sang political analyst, magluwas sa mga botante, ginabantayan man sang iban nga pungsod ilabi na sang Estados Unidos kag China ang dalagan kag mangin resulta sang eleksyon sa pungsod bangud pat-ud nga may epekto ini sa mangin dalagan sang relasyon sang Pilipinas sa sini nga mga kapungsuran.
