Gina-istoryahan subong ang bag-o nga video ni Senator Imee Marcos nga parody sang game show nga “Who Wants to Be a Millionaire?”
Sa Question No. 3, ginpamangkot sang “host” si Imee kun ano ang tawag sa pulitiko nga masami nagalain-lain sang duag kag political stance.
Una nga nagsabat ang senadora sang “political butterfly”, apang sala ini suno sa “host.” Sa iya script, nagpakuno-kuno naman ang senadora nga wala nakabati kag ginmensyonar ang “Ping”, apang ginklaro man sang “host” nga “Pink” ang sabat.
Wala sang ginhambal nga pangalan, pero antes sini nga parody, may tension sa tunga ni Imee kag Senate President Pro Tempore Panfilo “Ping” Lacson kaangot sa 2026 national budget.
Ginsabat ni Lacson si Imee sang damlag lang nga nagahimo ini sang mga wala-basehan nga istorya kaangot sa 2026 budget kag sa Senate blue ribbon committee. Ginbulgar man ni Lacson nga may “pork barrel” si Imee
“She makes a lot of noise criticizing the 2026 budget for having ‘pork’ but she had ‘pork’ in the budget,” kabahin sang statement ni Lacson.
Nag-react man anay si Lacson sa mga tirada ni Imee sa Senate Blue Ribbon Committee. Para sa iya, indi na ini kritisismo kundi insulto.
“Perhaps she wants to apply as the ‘meow meow of the Senate’? We don’t want a meow meow in the Senate, but someone seems interested to apply,” suno kay Lacson. Ang “Meow Meow” sa Kamara amo si suspended Cavite Rep. Kiko Barzaga nga kilala sa iya “meow meow” antics sa House sessions.
